मघौटा नाच Maghauta Nacha

मघौटा नाच Maghauta Nacha

सखियहो कना गित बोलट् टे माघ आइल जस्टे लागट् जहाँ इ गित बोलट् ओ नाच हुइट् उहाँ माघ आइल बा कना फेन सोहाइट् काकरे कि मघौटा छोक्रा नाच फरक मेरिक चोट्गर लगैना मेरिक रहट् । बर्सोसे भौंकम ढारल गरगहना टर्नि ओ बठिन्यनके आँगेम ठाउँ भेटैले रहट् लंहगा फरिया नचुन्यनके पुट्ठम फरफराइ पाइल रहट् । फुन्ना लागल चोलिया टर्नि ओ बठिन्यनके छाटिम चम्कल रठिन् । सुन भवाइल घर जगैटि घरघर नाच गित मनकल रहट् । 

ना जार ना घाम ठिक्केपर माघक महिना हो । कठैं संपार रना बेला फेन माघ हो कटि । इ बेला कट्नि बोइनि फेन ओराई रहठ । साइड इहे मारे हुइ माघ हमार थारुनके लाग बरे खुसिक् ओ बर्का टिह्वार मान जाइट् । 

माघ महिनक् पहिला बिहान लहाखोरके अपने आपहे पबित्र करैटि भगवान ओ जलम डेना डाइ बाबा हे सेवा लग्टि अपनसे भारि मनैनसे बरकट् लेना ओ छोट जहन बरकट् डेटि लावा जिन्गिक् सुरवाट हुइल महसुस कर्टि लावा योजना, लावा कामकाज से सुरु करजाइट् । इहे बेलाहो लावा घर बनैना लावा जोर्या डुल्हा डुल्हि खोन्जा ओ भोज कर्ना । 

माघेम थारुनके सक्कु जहान जुट्हि पर्ना रहट् । इहे बेला हो घरक लावा किसन्वा बनैना घर फुट्ना बनैना ओ गाउँक भलमन्सा छन्ना ओ गाउँक लावा निइम बनैना, गाउँक सक्कु हाल खवर बुझके निइम पक्का बनैना । 

माघ महिनक सुवाट कलसे थरुनके गाउँक भल्मनसा ओ गरक किसन्वा मार्फट गाउँ ओ घर चलैना सक्कु निइम कानुन बनैना काम हुइट । 

घरक किसन्वा अपन घरक ख्याल कर्टि घर चलैना कामेम लागाल रठैं कलेसे भलमन्सा/ महटावा/ बरघर गाउँम चलाइल नियम अनसार हर टिह्वार सिजन अनसार समाजहन चलैना कर्ठ । बाट अाइट् नाचगान रमैना ओ खैना राहरंगि करना । पहिले फलाना गाउँम नाच लौटंकि बा कटिकिल हरहरसे हेरे जाइट् डेखजाए मने आबक आधुनिक् जमाना म ओसिक करट् बहुट कम डेखजाइट् साइड प्राविधिक युग अइलक मारे हुइ हाँठ हाँठे घरघर मोबाइल कम्पुटर होगैल बा घर बठ्ले हेरे सुने मिलट् । 

असहेके एकठो मघौटा गिट के बाट करटु । आजसे तीन बरस पहिले एकठो मघौटा गिट निक्राल रहे । 

भिडियो सुरुहुइट् बहुटजे आगि टप्ठैं बरवार बरवार मुंगरा लकेरल रहठ् गिनोरे बठिनियन बैठ्के आगि टापट डेखाइट्  उहे बगालेम थारु पहिरनमे संपरल अन्जु कुश्मी के सुग्घुर रुप फेन डेखे मिलट् । अचानक् उहे बेला कलाकार राज कुश्मी आके ओइन खेल्वार करठैं ओ सक्कु जहन हँसैठैं ओ मघौटा नाच नच्ना सल्हा कर्ठैं । 

आप राज कुश्मीहे जोरडार डफ बोलाइट् डेखाइट् गाउँक मनै जुटल रठैं कोइ मंडरा बोजाइट् टे कोइ डफ मजिरा  । यहे संगे एकओर डिहुवा खेट्वा ओर लाहिम राज कुश्मी ओ अन्जु कुश्मी हे खेलट् डेखाइट् कलेसे एक ओर घरक अंगनामे नाचक् बगाल । उहे अंगना मे माघक् शुभकामना बाँट्चुट कर्टि नाच गित सुरु होजाइट् जोन गित चरचित बा सबके ढेबरेम् झुलल् रहट् सखियहो माघक् पिबि गुरिगुरि जाँर.. सुरिक सिकार ढिक्रिक् संगे पिबु गुरिगुरि जाँर कटि बरे जोरडार के संगे राज कुश्मी भेगुवा घालके कुडुक् कुडुक् मंडरा बोजैठैं कलेसे अन्जु कुश्मी लेहँगा फरियम पुट्ठा डुम्कैटि नाचट् हेरे मिलट् । अंगना मनैनके भारि भिभारसे भरल रहट् कलेसे गिनोरे ठंरिया बठिन्या गोचाली भिरके रमाइट् डेखाइट् । 

इ गितमे माघक् चलन अनसार निसराउ डेहेजाइट् डेखाइट् । निसारउ कलक् माघ लहाके छुअल चाउर हो । उ चाउर ओ संगे खेनाचिज फेन लेके चेलिबेटिन हे डेना चलन बा । ओहे रिट इ मघौटा गित नाचक् भिट्टर हेरे मिलट् । बरे चोट्गर लगैना राज कुश्मीके भेगुवक् पुस्टा उरेबार लागट् । इ गितमे नचिनियन रुपया लुटाइट् हेरे मिलट् जोन मघौटा नाचेज सबसे मजा लग्ना भाग हो । नाचेम पैसा लुटैना नाचक् मुख्य भाग मानजाइट् । पहिलक् नचुनियनके पैसा लुट्क् लिल्हारिम अभिन सम करिया छाप डेखे मिलट् । डुनु गाल भर भरके लुटल पैसा होजाइन् । पैसा लुट्ना टरिया इ गिटमे बरे मजासे डेखे मिलट् । 

थारुनके खानपिनमे बेल्सना डोनया पटिया बयान करल ओ साली भाटुक् मैयाँके बयान करल इ गितमे डेखजाइट् । मघौटा गित साली भाटुक् सैना लगाके गैना मध्य एक हो । इ गितमे डोहरी चलट् । नाच ओ गितमे साली भाटु एक डोसरहे चलाइक चला रहट् । 

नाच करना घर अंगक् मैयक् बयान कर्टि छाँकि ढिक्रि सुरिक सिकार खापिके माघ मनाइट् डेखाट् । इ गित खास कैके लावा पिह्रि हुँकन अपनै नाच गित हे बेल्सी ओ अपन पहिचान बचाइ कना मुल लक्ष्य बटिस । असिके इ मैयाँ लग्टिक भिडियो ओराजाइट् । 

गितके शब्द संगित राज कुश्मी के बटिन कलेसे अवाज फेन राज कुश्मी ओ अन्जु कुश्मी के बटिन् । बाँकि सक्कु जानक् लाग युट्युब च्यानल म जाइ सेक्बी । 

भिडियो के लिंक: 

https://youtu.be/i9WJW-hNma0?si=_T843b6ut-M9ZO8Y

भिडियो गित बरे चम्पन चोट्गर लगैना मेरिक बा एक चो नाहि घरिघरि हेरडेबी । धन्यवाद!