ना घरि ना जुन हेर्ना कौनो चिज । खेटि कर्के अपन परयार पल्ना मनै एकडम जिउ खेटिओर लागल रना कहिया जोटके सेकम, कहिया मेरुवा बाँढम, कहिया रब्बि बोइम, कहिया काटम, कहिया माली डैम ओ ओसा फटक डेहरि कुठलम ढारम । एक ओर जनिवा बगाल फेन हपन काठि पाटा, कुट्ना पिस्ना, भाट भन्सा, घारिक गोबर कहर्ना, घर अंगना बहर्ना, कुँवम पानी भरे जैना घरक सक्कु काम हेरे पर्ना ।
[भिडियो बिज्ञापन फेेन हेर्बि ]
पहिले हमार पालम दिन जोन्ह्या टोरैया हेर्के सब काम कैजाए कहिके बारा बटवाइ भिरल । उ बेला दिन समय अस्टे रहे मुटे उठ्लेसे टोरैया हेर्ना कत्राजुन हुइल कहिके । रातिक जुन टोरैया हेर्के पटा मिले, डोलि, बिछिया, खटोली, टिन गाँठा टोरैया हेर्के भिन्सार हुइलक पटा मिले । इ टोरैया के चिन्हा हेर्के हरोहिया खेट्वा ओर सोझर्ना टे जनिवा मनै कुटे पिसे उठना कणिट । भिनसरहि से ढेकिम धान कुट्ना फटकके चाउर बुसि अल्गैना । जार रलसे ठिके लग्ना घामक सिजन रलेसे पस्ना पसिन होके फेन कुटेपिसे पर्ना अपन परिवार पाले पर्ना । भिनसरहि २/३ बजे उठके कुट्ना पिस्ना जन्निनके काम रहिन कलसे थारुनके काम धान डैना रलसे भैंस गोरुनके माली बहानके माली घुम्ना करजाय । असिके महिनो सम माली घुमके अनाज सहेरजाए ।
[भिडियो बिज्ञापन फेेन हेर्बि]
पहिले बरे सुहावन लागे रातिक बद्रि, साँझ हुइलेसे अंगनम खटिया बिछाके सिटराइ बेला टोरैया हेरके लर्कन गिन्टि सिखाजाए, टोरैया नेगट डेखाजाए, टोरैया हेगलक डेखाए लर्का बरे खुशि हुइना करिट । सारा घरक मनै ओ परोसी घरक मनै एकठो अंगन गौह्रयाके सिटरैने मकै निखोर्ना ओ बटकोही खिसा सुनैना ओनैना करिट । जिन्गिक सुखडुखके बाट ओ बिटल घटल घटना बटवा जाए । इहे मारे एक डोसरके भावना बुझेसेकजाए ओ सम्बन्ध मजा बनले रहे ।
[भिडियो बिज्ञापन फेेन हेर्बि]
अबक समयमे डेखजाइट कोइ सल्हे नाइ सब जे अपने टाल मे रठैं । ना कोइ केकरो बाट ओनाइट ना कौनो सल्हा करना संपार रठिन । सल्हा अनसार काम करबो टे काम बनट, अकेल रना ओ अकेली काम करक खोजठैं ओहे मारे कौनो काम नै बन्ठिन ओहे मारे घरेम समस्या ठप्टि जाइट । अबक समयमे डेखजाइट मनैनके संघरिया, डाइ बाबा, जनिवा ठरुवा से ज्याडा ध्यान मटलब खोजी मोबाइलके रठिन । एहमारे ना कोइ अपन मनक भावना सुनाइ पाइट ना कोइ ओनाइट । ज्या देख्बो, सुन्बो ओहे मोबाल मे जेकर ठन मोबाइल रठिन टे अपनेहे अपनेहे हँस्ठै रमैठैं जेकर ठन नै होटे अकेलि टुवर लर्का, ओ किहुइसे बिछोड हुइल बेला हस कवाल बैठल रहना ।
[भिडियो बिज्ञापन फेेन हेर्बि]
पहिलक डिन समय रहे कोइ सजना मैना गाइटा कलसे बरे ध्यान ढैके ओनैना ओकर बयान कर्ना नाउ उठैना । ओहे गित मजा लागे गितमे थारुवा जन्निक मैयाँ पिरिमसे भरल मनक भाव ओनाइ मिले । भोन नै हुइल मन पराइल मनैके मिलन बिछोडके सु:ख-दु:खके मनक भाव ओनाइ मिले । चिट्ठी ना पत्र ओहे गिटेगिटले मनक बाट घुमाइक घुमा करिट । गिते मारफट अपन मनक दुख पिरके भावना गाके मन हलुक कराजाए । मागर, सजना, मैना, ढमार गितटे आउर ओनैटि बैराग लागट इ हे गितहो मनक भिट्टरके उकुस मुकुस हुइल बाट हे किलकोरट ।
[भिडियो बिज्ञापन फेेन हेर्बि]
अबक आधुनिक जमानामे गितिकथा कहिके जनठैं जिहिमे गितके संगे मनक भावना बिट्कोर जाइट । हमार थारुनके मागर ढमार मैना सजना गितके भिट्टर फेन बरे मनछुना मनैनके जिन्गिक कहानी नुकल बा । बारासे घण्टो सम भेठके मै बारासे बहुट कुछ बुझनु ओ सिखनु , सिखल बुझल कुछ बाट लिन्नु ओ कुछ बंचल बा । अगर जम्मा लिखम कलेसे पहर्ना मनै फेन मिच्छैना मेरिक लम्मा बा ओहे मारे आझुक बैठोनिमे अत्रे लिख्ना चहटुँ । कुछ कना बाट हमार अमूल्य सम्पती पुर्खनठन बटिन जोन हमार ओ हमार सन्तानके पहिचान गित बाँस कला संस्कृटि भेस भासा हो । पुर्खा नै रहजैहि ते के बटाइ कसिक जानप बुझप । अोहे मारे अपन सम्पती कसिके बचाइ सेकजाइ अपन टरफसे भिरल रहना जरुरी बा ।
[भिडियो बिज्ञापन फेेन हेर्बि]
-संगम चौधरी
0 टिप्पणियाँ