कहानी के परिचय
सबसे भारि सन्तान कलक कबिता हे डेखागैल बा । गजल मझला भैया ओ मुक्तक छोट्का के भुमिका खेल्ले बा । कबिता हे डुनु भैयन हे हर जोते बेर एक गुँइके जरुरट परेहस कुछ करक् लाग डु जहनके साथ जरुरि कहिके अपन भैयन नेंगे सिखैलेबा ।
"इ छोट कहानि मे गहिंर बाट हुइ सेकि केक्रो जिन्गिम मिले सेकि, केक्रो मन डुखेसेकि टे किहुइ होसला मिले सेकि । इ लेख केवल कल्पना हो । "
कहानिक् ओंरि असिके सरु हुइट् । कबिताहे डेखुइया कमे रठैं, तर हुँकार बारेम सुनुइया टमाम रहिंट । कबिता असिन रहिंन कि जे हुँकार बोली सुने कलेसे मोहन्या जैना । हुँकार मिठिस बोली मन गलैना हुँकार एक एक अँख्रा , हुँकार बोल्ना स्टाइल टे झने सहेनै सेक्ना मेरिक हर कोइक मुहेमसे वाह वाह निकर्ना । अँह कबु काल टे उ अपन मन गलैना अँख्राले प्रेमि प्रेमिका ओइनके आँस गिरडिन । बिग्रल सम्बन्ध से फेनसे बनैना ओ एक डिसरके मन मिलैना हुकार जिन्गिक परगा रहिन । हुँकार जिन्गिक बयान टे जत्रै करबो ओत्रै गहिंर हुइल कर्ना, जत्रै खोज्बो ओत्रै भेटैना, जत्रै किलकोर्बो ओत्रै डेखपर्ना , झंक्याके हेर्लेसे हेर्टि रहुँलग्टि रना । ओहे मारे हुँकार बयान कैके कबु नै बाट ओराई ।
हुँकार जिन्गिक सफरमे ढेरजे नेगै खोज्ठैं, हुँकारे जस्टे जीवन सैलिमे चल्ना खोज्ठैं ओ हुँकारे नाउँ अपन मनमे गुनगुनैठैं । हुँकारे प्रशंसा कर्ठैं हुकारे जिन्गिक बयान कर्ठैं । तर हुँकार जिन्गिक् कहानि बरे गहिंर बटिन हुँकार कल्पनामे डुब्के हलहल निक्करे नै सेकजाइट,दिन रात बिट्लक पटैनै चलट् ।
एक ओ डु भैया गजल ओ मुक्तक अपन डिडिक बयान सुन्ठैं ओ ओहे डिडिक सिखाइल कहल बाट याद अइठिन । कुछु अपन डिडिक सिखामे अपन रुपरंग फेन संवारे भिर्ठैं । डिडिक संगे इनके फेन नाउँ उठे गल्ठिन कुछ मनै वाह गजल वाह, वाह मुक्तक वाह कहे भिर्ठैं । गजलके बयान फेन बरे जोर करेभिर्ठैं ओकर जिन्गिक गहिंर कहानि फेन उहे कबिता के जस्टे रहिस, सुनलेसे मन गलजैना, सुनके मनै मोहन्या जैना ।
ओहोर मुक्तक बरे चट्पटहा रहे, नम्मा बाट करे नै जानट छोट बाट चट्कार अँख्रामे अपन बाट निप्टा डेहट् । चट्चार मे झट्कार ओकर बानि रठिस ओहे चाल ढेरजे सिखे लग्लै । साइट कोइ मनैन लम्मा बोल्ना मन नै परठुहिन ओहे मारे मुक्तकके बानि मन परैठैं । अपन छोट् बाटेम नम्मा बाट निप्टा डेना । असिके टिनुजे डिडि भैया मनैनके लजरमे भारि नाउँ उठैटि गिलाँ ओ अपन मिठ अँख्रासे अपन सब चिजसे सब जहनके मन बहलैटि, केकरो मनेम मल्हम पट्टि, केकरो जिन्गिम मिलनके गाँठ बनके चल्टि गैलाँ ।
पाठक संघरिया साइड अप्ने ओइने कुछ कुछ बुअगैल हुइबि । मैं कबिताके, गजलके ओ मुक्तकके बाट करले बटुँ । जाट्टिक कनाहो कलेसे अब्बा मनैनके जिन्गिम इहे कबिता, गजल ओ मुक्तक के आरमे अपन मनक गहिंराइके बाट सुनाइल ओ अपन मनैनहे मैयाँ प्रेम भावना सांटिक सांटा करल ओ बहुट जहनके जिन्गिक साहारा बने पुगल बा । साहित्य एकठो असिन चिज हो जोन मरल मनहे फेन टौगर बनाडेहट । जिन्गि जिए सिखाइट, लावा जोस जाँगर पैडा करट ।
- संगम चौधरी
0 टिप्पणियाँ